Diweddariad ar adolygiad Rôl Swyddogion Undeb Aberystwyth.
Fel rhan o'r ymgynghoriad presennol ar rolau swyddogion llawn amser o fewn Undeb y Myfyrwyr, rydym wedi penderfynu mynd i'r afael ag un agwedd benodol o’r adolygiad ar wahân. Daw'r penderfyniad cynnar hwn fel ymateb i bryderon a fynegwyd gan ein haelodau am ddyfodol rôl Swyddog Diwylliant Cymreig a Llywydd UMCA. O ganlyniad i gefnogaeth glir ac unfrydol a fynegwyd yn ystod ein proses ymgynghori, mae'r Bwrdd Ymddiriedolwyr wedi penderfynu parhau â'r trefniant presennol o gael Swyddog Diwylliant Cymreig a Llywydd UMCA fel rôl sabothol llawn-amser mewn unrhyw gynnig a fydd yn mynd i bleidlais myfyrwyr.
Dan arweiniad Swyddog Diwylliant Cymreig a Llywydd UMCA gyda chefnogaeth gan bwyllgor UMCA a staff Undeb Aber, mae UMCA yn cynrychioli myfyrwyr ar prif bwyllgorau y Brifysgol, yn darparu calendr llawn gweithgareddau i siaradwyr a dysgwyr Cymraeg, ac yn gweithio i sicrhau mynediad i addysg a chyfleoedd cyfrwng Cymraeg. Dathlodd UMCA ei hanner canmlwyddiant eleni ac rydym yn falch o'r cyfraniad cyfoethog y maent wedi'i wneud i ddiwylliant a bywyd Cymreig yn Aberystwyth a thu hwnt dros yr hanner canrif ddiwethaf.
Fel yr Undeb Myfyrwyr cyntaf yng Nghymru i fabwysiadu enw Cymraeg, cyflwyno polisi dwyieithog a gweithredu'n gwbl ddwyieithog, mae gan Undeb Aberystwyth hanes cryf o hyrwyddo'r Gymraeg a diwylliant yma yn Aber. Tanlinellir yr ymrwymiad hwn i'r iaith Gymraeg ymhellach gan ffaith fod y Bwrdd Ymddiriedolwyr wedi cadarnhau yr angen parhaol am rôl Swyddog Diwylliant Cymreig a Llywydd UMCA fel blaenoriaeth cyn gynted â phosibl.
Cam nesaf y broses fydd datblygu cynigion ar gyfer y tîm Swyddogion Llawn Amser ehangach, yn seiliedig ar fewnwelediadau pellach o'r ymgynghoriad. Bydd manylion y cynigion a fydd yn mynd i bleidlais myfyriwr yn cael eu cyhoeddi maes o law.